Dienstag, Oktober 25, 2016

چکرسینیز - رلیم خان یعقوب

آری لار گول منم قونون اوستومه
مندن نه چکسه نیز حاق چکرسینیز
باشینا گؤتوره ر عطریم دونیانی
سؤزون گلشنینده کئف چکرسینیز
دورنالار یئرلری گؤیلره قاتدیم
سیزینله اوچماغا هر گون جان آتدیم
ائله کی تورپاغین آلتیندا یاتدیم
مزاریم اوستونده صف چکرسینیز
زلیم خان اوره ییم قوزوتک مه لر
باشیم نه لر چکدی بیلیرسن نه لر
هانسی گون زلیم خان اؤلوب دئسه لر
اوندا بیرجه دفعه اوف چکرسینیز


Samstag, Oktober 22, 2016

اویان ای یار وفاداریم اویان - غفاری اردبیلی

اویان ای یار وفاداریم اویان
منی تک قویما علمداریم اویان

یولووی خیمه ده گؤزلور بالالار
سنه قربان اولا قیزلاریم اویان
شرف الناسیم اویان                   
گؤزل عباسیم اویان
*

سنه من قانه باتان آی دیرم
سینه وی لاله لره تای دیرم
داش آتانلاردان اگر اولسا امان
تؤکرم گؤز یاشی لای لای دیرم
قره معجرلریمین وای گونونه
سود امر اصغریمین وای گونونه
شرف الناسیم اویان                   
گؤزل عباسیم اویان
*

سرویمین لطمه دگوب قوللارینا
تؤکولوب قانی شرف یوللارینا
سنی اکبر جانی کیمدن سوروشوم
نه گلوب قارداشیمون قوللارینا
من اؤپن قاره گوزوندن اوخ اؤپوب
داش گؤزل سینه وی مندن چوخ اؤپوب
شرف الناسیم اویان                   
گؤزل عباسیم اویان
*

دئمیرم قارداشیوام گؤیلومی آل
دئمیرم دور گئدک اخیامیده قال
دئیورم دشمنی گولدورمه منه
کسیلن قوللاریوی بوینوما سال
ساق گؤزوندن تؤکولن قانه قسم
ایاقیم خیمیه گلمیر قئیدم
شرف الناسیم اویان                   
گؤزل عباسیم اویان
*

یارالی باشیوا قربان اولانیم
گؤزووی آچ باشیوا من دولانیم
نئجه سن سیز گئده رم خیمه لره
اؤزون انصاف ائله ای قهرمانیم
گؤزووه پرده چکیب قان یارالی
نیه بو حاله قالوبسان یارالی
شرف الناسیم اویان              
گوزل عباسیم اویان
*

بویاما گل اوزووی گؤز یاشیوا
دیله گل ائیله بیان قارداشیوا
سنی زهرا ننه مین جانی دانیش
نه آغیر یاره ووروبلار باشیووا
اورگین اودلادیلار قارداشیوین
بئلیمی اگدی یاراسی باشیوین
شرف الناسیم اویان              
گوزل عباسیم اویان
*

آسمان باشیما غم گردی الیر
سینه می ماتمیوین تیری دلیر
نقدر آختاریرام یوخدی ننم
باشین اوستن ننه مین عطری گلیر
بو مبارک اؤلومین وار نه غمی
خوش سنین حالیوا گؤردون ننه می
شرف الناسیم اویان              
گوزل عباسیم اویان

Montag, Oktober 03, 2016

ندن دیر؟ - علی بالا حاجی زاده

سن آللاه یوخوما گلمه گئجه لر
قورخورام سئوینج دن اؤلم یوخودا
یامان ایسته ییرم هامی دان گیزلی
من اؤزوم یوخونا گلم یوخودا گلم یوخودا
*
گلم طوفان کیمی گلم سئل کیمی
اؤپم گؤزلریندن یاناقلاریندان
اویویام قوینوندا قیزیل گول کیمی
نه سحر آچیلا نه سؤکوله دان
*
سنه نغمه دییم اینجه دن اینجه
اوره یین ایسینا خوشبخت لییندن
او گول دوداقلارین هئی پیچیلدایا
سن سیز نئینه ییرم خوشبخت لییی من
*
بئله جه یوخوندا یاشایام سنی
گؤرمک ایسته میرم کیمی کیمسه نی
دونیانین ان خوشبختی سایاسان منی
منیم تک کیم سئور دونیادا سنی
*
گاه آغلادیب گاه گولدوردون سن منی
حکمتینی بیلمک اولمور ندن دیر
سئله سویا غرق ائیله دیم جهانی
گؤز یاشیمی سیلمک اولمور ندن دیر
*
نه بیله یدیم خزان وورموش گولموشم
اؤز عؤمرومو سنین عؤمرون بیلمیشم
فلک منی آغلاداندا گولموشم
سن آغلاسان گولمک اولمور ندن دیر
*
یاشاماغا نه آمان وار نه گومان
باشیم اوستن چکیلمه ییر چن دومان
ایسته ییرم حسرتیندن وئریم جان
حسرتیندن اؤلمک اولمور ندن دیر
*
شاعر : علی بالا حاجی زاده
*