Freitag, November 20, 2015

اؤزومدن ناراضی یام

طبیعتین کؤنول آچان
مین رنگی ، مین سسی وار
هر کؤنولون مین آرزوسو
مین رنگی ، نغمه سی وار
بو آرزولار ، بو نغمه لر
بو سس لر بیر سس کیمی
منیم سولقون سؤزلریمده
هئچ دیل آچا بیلدی می ؟
حیسیم درین ، سؤزوم سولغون
قلبیم گئنیش ، سینم دار
مندن اول دوغولوبلار
سینم ده کی دویغولار
سهو آتیلان آددیملاری
سونرادان آنلاییرام
باخیب وجدان گؤزگوسونه
اؤزومو دانلاییرام
سیز ای یانلیش آددیم لاریم
منی درده سالدینیز
من سیزله دؤیوشدوکجه
گون – گوندن چوخالدینیز
من حق حساب ایسته ییرم
گئجه لر گوندوزومدن
ناراحاتام ، ناراضی یام
عؤمروم بویو اؤزومدن
بیزیم صنعت دنیاسینین
قیریخ تئللی سازی یام
بیرجه بوندان راضی یام کی
اؤزومدن ناراضی یام
*
بختیار وهابزاده
*