Montag, Januar 26, 2015

جعفری یم - هوشنگ جعفری زنگانلی

 وارلیق دا بوتون وارلیغیمیز شعر و غزل دی
هر بیر غزلیم ائللر آرا ترکه مثل دی
من جعفری یم شعر یازارام ترکو دیلینده
تورکون بالاسی تورک اولا عالم ده گؤزل دی
منه حقارتیله باخمایین غزل کانی یام
واراق – واراق داغیلان ائلده شعر دیوانییام
منیم وقاریمی گئت چله خانه دن خبر آل
اخی پرست کیمی یم من ده عشق سلطانی یام
اولار کی عاشق دل خسته دیر تانیرلا منی
بو اؤلکه ده اؤلن عاشق لرین چیخان جانی یام
یاشیل چمن ده بیتن سینه داغلی بیر لالایام
نسیمی نغمه سی یم من فضولی نین قانی یام
آری کیمین دولانین گوللر اوسته ، بال گتیرین
آنام دیلی شیره دیر ، من او شیره نین شانی یام
بو فخردیر منه آذر ائلیم دی تورک دیلیم
منیم بسیم دی فقط سهروردی نی تانییام
سؤز اوستادیم بویوربدور کی خالق شاعیری یم
غزلچی جعفری یم ائللرین آدی سانی یام

Dienstag, Januar 06, 2015

بیر باخیش - هوشنگ جعفذی زنگانلی

هر گئجه نی صوبحه کیمی بی قرار
آغلامیشام آغلامیشام زار زار
گؤز به به گیمده گؤرورم من سنی
جمله گؤزل لیک لر اولور تار و مار
گؤیده بولود گؤردو سنی آغلادی
گؤز یاشینی تؤکدو یئره شار شار
پلاکلادی توزدان اوزونو چای چمن
گوللر آچیب اویناغا گلدی باهار
باش گؤتوروب اوینادی سو آخماغا
داش تپه یه چالدی باشین آبشار
دریادا دیل سیز بالیغین گؤزلری
قدرت – ی حق دن دانیشیر آشکار
بیر باخیشین عرشی ایشیق لاندیریر
یئرده ایشیق دان یارانیر شاهکار
لاله گؤزونده نه گؤزللیک گؤروب
تا گؤز آچان گوندن اولوب داغدار
گؤیده کی یئللر سنه خاطر اسیر
باشین اوجالدیر سنه خاطر چنار
بیرده سالارسان منی من سیزلیگه؟
سال کی گؤزومدن دوشه دار و ندار
سن کی منیم غصه لی قلبیمده سن
آخ گئنه من سسله نیرم ، یار ، یار
داد ائله دیم دادیمه ائللر گلیب
باشیما یکسر ییغیشیب قونشولار
هر بیری سؤز بیر دره دن باشلادی
قارقا کیمی سالدیلار هی قار – قار
گاه دئدیلر بو یازیغین قلبی دی
یا سرطان دردینه گلمیش دوچار
رنگی سولوبدور سارالیب گؤزلری
یا جیگریندن قیریلیب دیر دامار
یا دلی دیر بو دلی دیر بو دلی
یوخسا ندن صوبحه کیمی سیزلایار
آغلادی بیچاره قیزیم سؤیله دی
یوخ ، بابامین دا یئنی بیر دردی وار
« من بیلیرم ائوده دووارلار بیلیر
اؤلدوره جکدیر بابامی درد یار»