Freitag, August 30, 2013

آخشاملار - علی آقا واحد

دوشه‌ نده طره‌ی دلبر خیاله آخشاملار
محبّت اهلی باتار، مین ملاله آخشاملار
شکسته بولبوله بنزه‌ر بلا چکن عاشیق
گولوندن اؤتری ائدر آه و ناله آخشاملار
گونوزلر عاشیقه طعن ائتمه کی، گولوب دانیشیر
سالار فراقین، اونی گور نه حاله، آخشاملار
دوشه‌ نده زولفون اوزه، قاشلارین خیاله دوشر
باتاندا گون، باخار عالم هیلاله آخشاملار
شرابی یارسیز ایچنده ،  بیر آزدا غم گتیره‌ر
گول اوزلی یار ایله اول ، هم‌ پیاله آخشاملار
بیر اؤزگه لذّتی وار، عاشیقه معشوقه
رقیب‌ سیز اولا محرم ، وصاله آخشاملار
میسّر اولماسا گوندوز سنه شراب ایچمک
اوُنوتما، واحد، اونی لامحاله آخشاملار!
*

Sonntag, August 25, 2013

درنالار - مهدی همت زاده

دوزولون دال – دالا سیز قاتار قاتار
گویلرده ایز سالین ، ایز ، قاتار قاتار
قوشولاق  سیزلره  بیز   قاتار قاتار
سس سالاق بیرلیکده چؤله دورنالار
آماندی   قاییدین   ائله    دورنالار
*
غفلت  یوخوسوندا یاتانلار واردی
یوردونو  گوزوندن آتانلار واردی
غیرتینی اوجوز  ساتانلار واردی
گرک کی اولمویا بئله  دورنالار
آماندی  قاییدین  ائله   دورنالار
*
کیمی شاهلار کیمی تاج آلدی گئتدی
کیمی باج وئرمه دی باج آلدی گئتدی
حییف خان چوبانا  قوجالدی  گئتدی
سارانی تاپشیردی  سئله  دورنالار
آماندی  قاییدین   ائله    دورنالار
*
اولکه ده آز دئییل کؤچری قوشلار
قاناد چالیب اوچان یووانی بوشلار
کوک سالار یوردوندا قانلی بایقوشلار
بولبول حسرت قالار گوله دورنالار
آماندی   قاییدین   ائله    دورنالار
*
کروان کروان اوچون ائل سیزینکی دی
چمن سیزینکی دی  چؤل سیزینکی دی
ائلی بیرلَشدیرَن  یول   سیزینکی دی
یاد ایستیر بو ایزی  سیله   دورنالار
آماندی   قاییدین   ائله    دورنالار
*
اووچولار  یوللاردا کمین  وورسادا
جوللر  قوروسادا  سولار  دورسادا
گویده  قارا  بولوت  چادر  قورسادا
غم  توزو  قوندورما  تئله  دورنالار
آماندی   قاییدین    ائله    دورنالار
*
ظفر سیزینکی دی یوللاری یورون
چالیشین تیکانلی کوللاری  یورون
سیزی  داشا توتان قوللاری یورون
دوشمه یین نفسدن  هله  دورنالار
آماندی  قاییدین   ائله   دورنالار
*
اژدها   اولوپدو  دونَنکی   ایلان
اینانما  سوزلری  یالاندی  یالان
محو اولسون آرایا  آیریلیق سالان
او ایستیر سیزلری بؤله  دورنالار
آماندی   قاییدین   ائله   دورنالار
*
بو کروان دال ـ دالا  دؤزؤلمه لیدی
ایپ  اینجه لن  یئردن اؤزؤلمه لیدی
ایاق   آلتدا    قالیب    ازیلمه لیدی
سالخیمدان آیریلان  گیله  دورنالار
آماندی   قاییدین    ائله   دورنالار
*
بیر یئره ییغیشین بیرلیک یارادین
بیرلیکدن  یارانان  لذّتی   دادین
قایالار آغنادین  داغی  اوینادین
بم سسلری قاتین زیله  دورنالار
آماندی  قاییدین   ائله   دورنالار
*
سنده کی گؤزللیک سنده  کی  وقار
یاشی چن دومانلی  داغلاردا  اولار
آتالار  سوزودور   ائتمه   اعتبار
اؤروشون  بیلمه ین  یئله  دورنالار
آماندی   قاییدین    ائله   دورنالار
*
یارین بولوتلاری   آشین   داغلاری
سیزی  قورخوتماسین داغلارین قاری
اونوتموش اولسازدا بیزیم  ائلداری
قورمایین   یولونا    تله   دورنالار
آماندی   قاییدین   ائله    دورنالار
*
شاعر : مهدی همت زاده - ائلدار ماکو
*

Samstag, August 24, 2013

اهربابایه سلام - خان چوبان

قره داغليام
آديم خان چوپان
اهربابايه سلام آدي اولان نظيره ني حيدربابايه سلام منظومه سيندن ايلهام آلاراق يازميشام و يازيرام. 
*
اهربابا، يئخدي بيزي زلزله

قره داغدا، دؤشدي يامان،‌ ولوله

داملار اوشدي، چاتمادي اللر اله

بير لحظه ده، داملاريميز،‌ لاخلادي

شكر اولاكي، الله بيزي ساخلادي
*
اهربابا، مين پارا كندين هاني

دؤشده سَريلميش قارا كندين هاني

گوللي بزكلي،‌ سارا كندين هاني
ايندي دئير كتديلرين « فصلي» دي! 
چوخلاري « فرعي»، ياپ آزي « اصلي» دي!
*
اهربابا، گئدير سويا كنديميز
دونن علي، بويون ولي،‌ صاباح بيز
گلين گئداخ آچيب قوجاغين تبريز
اولمادي داي كنديميزين واياسي 
دوشدي گؤزدن، داغي داشي؛ قاياسي
*
اهربابا، سئخدي بيزي زلزله
سيلكله دي چوخلي ميزي زلزله
توكدي چوله عيب ميزي زلزله
دؤز ايشي، اَيري گوره نه، عار اولا 
مرد اودوكي ميلتينه، يار اولا
*
وبلاکین آدی : اهربابایه سلام
*

Freitag, August 23, 2013

بو سئوگینین آدی ندیر بیلمیرم - جیغاتئل عیسی قیزی

بو سئوگینین گؤزلری بیر دنیزدی
بو سئوگیمیز گؤیلر کیمی تمیزدی
آنام قدر بالام قدر عزیزدی
بو سئوگینین آدی ندیر بیلمیرم
یارادانین یاراتدیغی گؤزل دیر
سئودا یئنی سئودا یئی گؤزل دیر
بیر اثردیر بیر شعر دیر غزل دیر
بو سئوگینین آدی ندیر بیلمیرم
فرقیمیز چوخ فرق ایچینده فرق سیزیک
فرقیمیز یوخ فرد ایچینده فردسیزیک
بیر آنادان دوغولمامیش عکیزیک
بو سئوگینین آدی ندیر بیلمیرم
یوخو گؤردوم یوخوم عرشه داغیلدی
عاغیللی یام عاغلیم دلی عاغیل دی
بو سئوگیمیز اوخونمامیش ناغیل دی
بو سئوگینین آدی ندیر بیلمیرم
زامانین حکمودور واخت سئوگی سی دیر
قدردی قیسمت دیر باخت سئوگی سی دیر
ایلاهی یازیسی حاق سئوگی سی دیر
آی جیغاتئل دئمه ندیر بیلمیرم    
بو سئوگینین آدی ندیر بیلمیرم
*
جیغاتئل عیسی قیزی
*

Montag, August 19, 2013

دنیا - زلیم خان یعقوب

واختیندا اوزالدیب کمک الینی
وئرمه دین منیم له ال اله دونیا
نه ییمه لازیم دی واختی کئچنده
گؤیدن قیزیل یاغدیر لعل اله دونیا
یولسوز یوخوشلاردا یوردون بیزلری
آهین لا قوروتدون گؤی دنیزلری
قوی کسسین چیگنیمی کندیر ایزلری
دردی درد اوستوندن شله له دونیا
آجی یئل اوستومدن اسدیکجه اسدی
قار یاغدی یولومو باغلادی کسدی
گل منی یاندیرما بو قدر بسدی
من کی نه کرمم نه  له له دونیا
آشیلماز داغلاری من نئجه آشیم
زلیم خان ، غصه دن چاتیلیب قاشیم
او سنین داشین دی بو منیم باشیم
نه قدر ایسته سن گل اله دونیا
*
دنیا
به موقعش دست درازکرده
دستم را نگرفتی دنیا
می خواهم چه کار بعد از گذشتن وقت
آز آسمان بر سرم لعل و جواهر بباری دنیا
در سربالائی ( های همچون سراب)  خسته کردی ما را
با آهت خشکاندی دریاهای پرآب را  
بگذار ببرد طنابت کتفم را
الهی که درد بر روی دردت بیفزاید دنیا
باد سرد تا می توانست وزید
برف بارید و راه را بر من بست
این قدر مرا نسوزان بس است بس
من نه کرمم و نه له له ای دنیا
از کوههای ناهموار چگونه بالا روم
زلیم خان ، از غصه گره خورده ابروهایم
آن سنگ تو و این سرم
هر قدر دلت می خواهد برسرم ببار دنیا
*